الموت جبان سعيد شحاته , الموت جبان

الموت جبان سعيد شحاته , الموت جبان
الموت جبان سعيد شحاته , الموت جبان
الموت جبان سعيد شحاته , الموت جبان
لملم جميع أوراقك المتبعتره
قلبك ما عادش يؤُمّنا فى المندره
ولا عاد هيرسم للعيال الشقيانين
فرحة ورود الصبر وسط القاهره
لملم جميع أوراقك المتبعتره ف أرض الميدان
واضحك فى وش الموت وفوت شاهد عيان
الموت جبان
لملم جميع أوراقك المتبعتره
لكن
مالمش وردك السهران فى أحضان الغيطان
ولا ضحكتك على زهرة البستان
ولا بصمة الدم اللى ع القضبان
ولا قسوة الحلم اللى بيحاول
يكسر جموح الشهوه فى السلطان
ولا شعرك المفروض على السجان وع السيّد
الموت جبان
والقلب متقيّد
والشعر بيعيّد على الصايمين
وش السما بيضحك لسحنة مين؟
وش السما بيضحك على طلوعك
واللا السما بتضحك على الغايبين؟
الموت جبان
وملايكتك واقفين
شايلين ضلوعك من إيدين الناس
وموضيينك من دموع حطين
وأنت اللى طالع حاضن الأوجاع
ومتبّت الروح بين خلايا الطين
الموت جبان
وملايكتك مستنيين بالورد
ما انت اللى قادر ترسم النجمات
وانت اللى قادر تترسم ع الأرض
وانت اللى قادر تحضن السماوات
وانت اللى قادر ع الوجع والبرد
وانت اللى قادر تصبح الفرض اللى فى قلوب العيال
وانت اللى قادر تتبدر وسط المحال
تطرح على شطوط الكنال فدان فرح
قول كلمتك
وملايكتك مستنياك بالورد والحُور بالطُرح
والطيبين بيشاوروا بجريد البلح ع الضفتين
وانت اللى ماشى ف سكتك
مفرود ومرفوع الجبين
الموت جبان
والشعر رافع جمرتين الخوف
الليله ليلة القمر
بس القمر مكسوف
الليله ليلة الخسوف الكلى والشامل
الموت خطف ضحكتك
والشمس مش حامل
والنور بيتعامل مع الأموات
مين اللى هيسب الكلاب والجات
مين اللى هيبوس العيال بالليل
ويمدد الأوجاع على الكنبات
الموت جبان
وانت اللى سايب للسكات الحلم
عاقد خيوط الظلم ومهاجر
الأرض كرباج فوق ضلوع الناس
والليل ملامح من وطن فاجر
الموت جبان لابس هدوم تاجر
وانت المهاجر من بعيد لبعيد
انت اللى رافض لذّة الأعياد
وعيال بلادك محتاجينك عيد
الموت جبان
وانت السعيد بالموت
روحك بترقص فوق فروع التوت
وملايكتك ما شيين ورا الأتباع
وبيرسمولك ورده فى الملكوت
الموت جبان
وانت السعيد بالموت وبفراق البلاد
انت اللى رافض عاد وأتباعه
والمعروضين على كف بيّاعه
والمبدورين من ظلم أوجاعه ف زوايا البور
الموت جبان
وإيديك بتفرط ع المطارح نور
قلبك مهاجر واليمام ع السور
والدور حيطان ساكته
طب مين هيضحك تانى ع النكته اللى ما أعرفهاش؟
أو مين هيتصعّب على الأوباش ؟
النيل بقاله سنين ما جاش بالطمى
وانت اللى طميك زى طمى النيل
بتغيب وترجع بالوجع قنديل
بتغيب وترجع خيل على الساحه
راضع أمل من صدر فلاحه
بتغيب وترجع طعم تفاحه ف أيادى الرّب
الموت جبان
والأب نفس الأب
والقلب لو وزنوه هناك هيطُب
هيكب روحه ف مخلة التنفيس
الموت جبان
والأرض للعتاريس وللأتباع
للى اتنصب واحتال على الأوضاع
الأرض لملوك الضياع والقصر
للى انتشى وبدّل نشيد النصر
وملايكتك واقفين يصلوا العصر
وانت المهاجر من بعيد لبعيد
لكن مازالت بين ضلوعك مصر